Sýningaropnun: Hólmlendan eftir Richard Mosse

Sýningin Hólmlendan eftir Richard Mosse opnar í Hafnarhúsi föstudaginn 30.09.2016 kl 20. Mosse situr fyrir svörum í Hafnarhúsi kl. 21 ásamt samstarfsönnum sínum.

Sýningin stendur til 01.01.2017.

Hólmlendan er fjörutíu mínútna myndbandsverk sýnt á sex risaskjám auk ljósmynda. Myndirnar eru teknar í austurhluta Kongó. Upptökurnar eru magnþrungnar og óraunverulegar, í bleikum tónum, og sýna stríðshörmungarnar í landinu. Að auki er til sýnis úrval stórra ljósmynda úr myndböndunum.

Grunnurinn að verki Mosse er hugmyndin um að ofgnótt ímynda frá stríðshrjáðum svæðum hafi gert okkur ónæm fyrir þeim hörmungum sem stríð hefur í för með sér. Hræðilegar myndir frá átakasvæðum víðs vegar um heiminn birtast svo reglulega á skjám okkar að oft sláum við þær einfaldlega út af borðinu sem enn eitt sjónrænt áreitið. Mosse varði nokkrum árum við myndatökur af mið-afrísku fólki og landslagi sem hefur orðið illa úti í stríðsátökum. Hann notaði aflóga innrauðar filmur sem voru hannaðar í hernaðarlegum tilgangi til að koma auga á skotmörk í felulitum. Þessar filmur nema ósýnilegt litróf og breyta grænum lit í skærbleikan, þannig að landslagið tekur á sig óraunverulegan, litskæran blæ. Mosse og samstarfsmenn hans, kvikmyndatökumaðurinn Trevor Tweeten og tónskáldið Ben Frost, komu sér fyrir meðal vopnaðra kongólskra uppreisnarmanna. Afurðin, Hólmlendan, er bleik og heillandi, hryllileg og afar áhrifamikil sýning ímynda frá þessu stríðshrjáða svæði.

Sjá nánar um sýninguna á vef Listasafns Reykjavíkur.