Páll Stefánsson Núna – Ljósmyndasafn Reykjavíkur

Núna er yfirskrift sýningar með ljósmyndum Páls Stefánssonar sem opnuð verður í Ljósmyndasafni Reykjavíkur laugardaginn 19. janúar kl. 15.00

„Eftir þrjátíu og sjö ár sem ferðalangur og ljósmyndari er það þögnin sem er hvað minnistæðust. Þessi ærandi þögn í endalausri víðáttu Vatnajökuls, líka þrúgandi þögnin í Cox´s Baazar í Bangladesh þar sem hálf milljón flóttamanna höfðu misst málið. Ég er ekki að líta til baka, þessi sýning er um núið, þau augnablik sem ég er að fanga hér og nú. Flóttamenn á faraldsfæti, straumhörð á sem líður áfram. Kona í hvarfi bak við við þúfu eða hól. Hól sem breytist í fjall. Fjallmyndarlegan mann sem á ekkert. Ekki einu sinni framtíð.“

Páll Stefánsson er fæddur norður undir baug, í Öxarfjarðarhreppi árið 1958. Hann nam ljósmyndun í Svíþjóð frá 1979 til 1982 og er nú Sony Global Imaging Ambassador. Páll hefur gefið 37 bækur, með myndum af fjöllunum handað við hornið, líka af koptískri stelpu í Alexandríu og löngum skuggum á gulnuðum sandi í Önundarfirði fyrir vestan.

„Ef staðir fanga mig, þá gríp ég augnablikin,…..núna.“

Sýningin mun standa til 12. maí 2019.