Kjarvalsstaðir: Leiðsögn sýningarstjóra

Sunnudaginn 6. september n.k. verður Markús Þór Andrésson sýningarstjóri á Listasafni Reykjavíkur, Kjarvalsstöðum með leiðsögn um sýninguna Allt sem sýnist – raunveruleiki á striga 1970-2020. Það er kjörið tækifæri til að nýta sér mánaðartilboð Menningarkortsins sem felur í sér að handhafar kortsins geta tekið með sér gest í hvert sinn sem þeir heimsækja safnið í september. Aðgangur er ókeypis fyrir handhafa Menningarkorts Reykjavíkur og Árskorts Listasafns Reykjavíkur og aðgöngumiði á safnið gildir. Leiðsögnin stendur yfir frá klukkan 14:00 til um 15:00. Athugið að vegna fjöldatakmarkana er skráning nauðsynleg. Það er hægt að gera hér: https://bit.ly/2FzXb7e

Sýningin: Allt sem sýnist – raunveruleiki á striga 1970-2020
Fjölmargir listmálarar sækjast eftir því að ná fram ímynd raunsæis í verkum sínum. Til að ná árangri tileinka þeir sér handbragð sem krefst bæði þjálfunar og tækni auk þess sem þeir gefa ýmsum smáatriðum gaum. Þegar vel tekst til vekja verk þeirra undrun og ánægju áhorfenda sem trúa vart sínum eigin augum. En er allt sem sýnist í málverkum sem unnin eru í raunsæislegum anda?

Þegar horft er yfir hálfrar aldar sögu íslenskra raunsæismálverka kemur í ljós að listamenn færa sér þessi stílbrigði í nyt á afar ólíkum forsendum. Allt frá því að popplistin kom fram á sjónarsviðið á sjöunda áratugnum til hinnar stafrænu byltingar samtímans má rekja ótal þræði með viðkomu í natúralisma, ljósmyndaraunsæi, ofurraunsæi, töfraraunsæi og víðar. Viðfangsefnin eru af ýmsum toga; náttúran, manneskjan og nærumhverfi hennar, kyrralíf og frásagnir, miðlun myndmáls og eðli sjónsviðsins. Þar skarast gamalkunn mörk há- og lágmenningar, handverks og inntaks, listar og listlíkis. Raunveruleikinn tekur á sig ýmsar myndir þegar hann er dreginn upp á striga.