Haustfrí grunskólanna | Fjölskyldur hvattar til að njóta útiveru á Árbæjarsafni og í Viðey

Haustfrí grunnskólanna í Reykjavík stendur nú yfir dagana 22.-26. október 2020.

Borgarsögusafn hvetur fjölskyldur til að njóta útiveru í fallegu umhverfi Árbæjarsafns og Viðeyjar í haustfríinu og virða fyrir sér safnhúsin, listaverkin og náttúruna.

Í tilefni af haustfríinu hefur verið settur upp skemmtilegur leikur á safnsvæði Árbæjarsafns. Leikurinn gengur út á að finna alls átta miða í gluggum sex húsa á víð og dreif um safnsvæðið. Á miðunum er skemmtilegur fróðleikur um Ísland fyrr á tímum. Þegar gestir hafa lesið alla átta miðana er næsta skref að fara á Facebooksíðu safnsins og svara þar nokkrum laufléttum spurningum.

Um helgina er síðan um að gera að taka Viðeyjaferjuna frá Skarfabakka en hún siglir 3svar á dag á laugardögum og sunnudögum kl. 13:15; 14:15 og 15:15. Muna bara að síðasta ferjan til baka fer kl. 16:30. Menningarkorthafar fá 10% afslátt í ferjuna. Í Viðey er góð aðstaða til skemmtilegrar útiveru og að sjálfsögðu almenningssalerni.

Þess má geta að á vef Borgarsögusafns er að finna mörg fróðleg og skemmtileg myndbönd sem upplagt er að kíkja á í haustfríinu. Sjá hér.

Vinsamlegast athugið að söfnin sjálf Árbæjarsafn, Landnámssýningin, Ljósmyndasafn Reykjavíkur og Sjóminjasafnið í Reykjavík eru lokuð vegna samkomutakmarkanna. Í Viðeyjarstofu verður veitingasalan opin og opnunartíminn er eftir áætlunarsiglingum. Við hvetjum að sjálfsögðu alla til að huga að persónulegum sóttvörnum.

Góðar stundir í haustfríi og verið velkomin á safnsvæði Árbæjarsafns og Viðeyjar!