Aðalstræti 10 opnar sem safn og sýningarhús

Aðalstræti 10 opnar sem safn og sýningarhús

Hið sögufræga hús að Aðalstræti 10 hefur opnað sem safn og sýningarhús á vegum Borgarsögusafns Reykjavíkur. Frítt er inn á safnið fyrir handhafa Menningarkorts Reykjavíkur. 

Um er að ræða eitt elsta og merkasta hús borgarinnar, í hjarta gamla miðbæjarins, reist árið 1762 fyrir starfsemi verksmiðja Innréttinganna. Saga hússins er samfléttuð sögu Reykjavíkur. Þegar það var reist var hér aðeins vísir að þorpi og íslenskt samfélag byggði enn fyrst og fremst á sjálfsþurftarbúskap í dreifbýli. 140 árum síðar var Reykjavík orðin að höfuðstað landsins, iðandi af mannlífi og á hraðri leið inn í nútímann. Nú er þetta fallega og merka hús orðið hluti af Borgarsögusafni Reykjavíkur þar sem hægt er að kynnast sögu borgarinnar og íbúa hennar. 

Í glæsilegu bakhúsinu hafa verið opnaðar tvær sýningar:

Ljósmyndasýningin Reykjavík 2018 er samstarfsverkefni Þjóðminjasafns Íslands og Borgarsögusafns Reykjavíkur, sett upp í tilefni af aldarafmæli fullveldis Íslands. Höfundur texta sýningarinnar er skáldið Sjón og kemst hann svo að orði um viðfangsefni hennar: "Er maður hugsar til fólksins sem lifið árið 1918 þykir manni ótrúlegt að það hafi haft tíma til þess að lifa svokölluðu venjulegu lífi, það hljóti að hafa verið of önnum kafið að takast á við hina sögulegu viðburði til þess að elska, vinna, dreyma og þjást. En líkt og við sjálf - sem einnig þykjumst lifa viðburðaríka tíma - átti það sér sína daglegu tilveru, í sinni litlu en ört vaxandi Reykjavík, og um það bera ljósmyndirnar á þessari sýningu vitni."

Torfhúsabærinn Reykjavík er sýning sem byggir á rannsóknum Hjörleifs Stefánssonar arkitekts. Sýningin fjallar um torfhús í Reykjavík frá upphafi landnáms til fyrstu áratuga 20. aldar. Í þúsund ár var Reykjavík torfhúsaþorp, svo tók við stutt timburhúsatímabil og í eina öld hefur Reykjavík verið steypuhúsabær. Torfhúsum 19. aldar eru gerð skil með samtímateikningum og ljósmyndum auk þess sem húsaskipan er skýrð með teikningum sem gerðar hafa verið á grundvelli ritgerðar Þórbergs Þórðarsonar Lifnaðarhættir í Reykjavík á síðari helmingi 19. aldar og ýmsum skjölum frá sama tíma. 

Í húsinu er einnig starfrækt vönduð safnbúð Borgarsögusafns Reykjavíkur. Menningarkorthafar fá 10% afslátt þar sem og í öðrum safnbúðum Borgarsögusafns og Listasafns Reykjavíkur.